Fram átti ekki í vandræðum með að vinna nýliða Gróttu í þriðju umferð Olísdeildar kvenna í handknattleik í Hertzhöllinni á Seltjarnarnesi í kvöld, 29:20, eftir að hafa verið sjö mörkum yfir í hálfleik, 15:8.
Fram hefur þar með unnið þrjá fyrstu leiki sína í deildinni og stendur jafnfætis Val við stigasöfnun. Hvort lið hefur sex stig. Þau eru einu taplausu lið Olísdeildar þegar hér er komið við sögu.
Grótta hefur tvö stig eftir góðan útisigur á Selfoss á síðasta föstudag. Liðið hefur hinsvegar tapað báðum heimaleikjum sínum til þessa.
Snemma varð ljóst að munurinn á liðunum er töluverður. Sterkur varnarleikur Fram gerði leikmönnum Gróttu erfitt fyrir, ekki síst í fyrri hálfleik. Framliðið hefur innan sinna raða marga þrautreynda leikmenn ólíkt Gróttu þar sem flestir leikmenn hafa minni reynslu.
Að loknum 20 mínútna leik var staðan 10:4. Síðustu mínútur hálfleiks voru jafnari og sjö marka munur, 15:8, þegar gengið var til búningsherbergja. Í síðari hálfleik voru yfirburðir Fram áfram talsvert miklir. Gróttuliðið lagði aldrei árar í bát og tókst að minnka muninn í fimm mörk, 24:19, þegar liðlega sex mínútur voru eftir. Nær komust leikmenn Gróttu ekki. Fram tók leikhlé og jók forskot sitt eftir það allt til leiksloka.
Mörk Gróttu: Tinna Valgerður Gísladóttir 6, Daðey Ásta Hálfdánsdóttir 3, Arndís Áslaug Grímsdóttir 2, Ólöf María Stefánsdóttir 2, Katrín S. Thorsteinsson 2, Ída Margrét Stefánsdóttir 2, Katrín Helga Sigurbergsdóttir 1, Karlotta Óskarsdóttir 1, Katrín Anna Ásmundsdóttir 1.
Varin skot: Anna Karólína Ingadóttir 5, Sara Xiao Reykdal 4.
Mörk Fram: Steinunn Björnsdóttir 9, Alfa Brá Oddsdóttir Hagalín 7, Lena Margrét Valdimarsdóttir 6, Þórey Rósa Stefánsdóttir 4, Erna Guðlaug Gunnarsdóttir 2, Hildur Lilja Jónsdóttir 1.
Varin skot: Darija Zecevic 9, Andrea Gunnlaugsdóttir 4.
Tölfræðin hjá HBStatz.
Staðan og næstu leikir í Olísdeildum.
