„Við gáfumst upp, misstum trúna. Frammistaðan í síðari hálfleik var bara til skammar,“ segir Halldór Stefán Haraldsson þjálfari KA við handbolta.is eftir 11 marka tap liðsins fyrir Aftureldingu, 33:22, að Varmá í kvöld í þriðju umferð Olísdeildar karla í handknattleik.
KA var þremur mörkum undir í hálfleik en tapaði algjörlega niður þræðinum á upphafsmínútum síðari hálfleiks og tapaði með 11 marka mun.
„Fyrri hálfleikur var frábær hjá okkur þótt ekki tækist að tengja saman markvörslu og vörn. Mér fannst við hinsvegar spila fínan bolta og gátum verið sáttir að honum loknum. Síðan vorum við okkur til skammar í síðari hálfleik. Við misstum trúna. Ég held að nokkrir leikmenn verði að líta inn á við,“ segir Halldór Stefán þjálfari KA ennfremur.
Lengra myndskeiðsviðtal er við Halldór Stefán efst í þessari frétt.
Staðan og næstu leikir í Olísdeildum.
