Handvömm við útfyllingu á leikskýrslu fyrir viðureign Aftureldingar og KA í Olísdeild karla í handknattleik sem fram fór að Varmá í gær varð til þess að Kristján Ottó Hjálmsson var ekki í leikmannahópi Aftureldingar í leiknum. Þetta var ekki í fyrsta sinn á leiktímabilinu sem leikmaður gleymist þegar leikskýrsla er skráð.
Þegar glöggur maður áttaði sig á að nafn Kristjáns Ottós var ekki að finna á leikskýrslunni var sá tími liðinn sem liðum er gefinn til að skrá leikskýrslur í mótakerfið. Samkvæmt nýjum reglum, sem fylgt er mjög fast eftir í upphafi Íslandsmótsins, eiga útfylltar leikskýrslur að liggja fyrir 60 mínútum áður en leikur hefst. Engar undanþágur eru veittar.
Svipað atvik átti sér stað fyrir leik Gróttu og KA í 1. umferð Olísdeildar fyrr í mánuðinum. Þá fórst fyrir að skrá Andra Ísak Haddsson leikmann KA á skýrslu. Andri Ísak mátti þar af leiðandi fylgjast með samherjum sínum úr áhorfendastúkunni.
Ljóst er að þeir sem fylla út leikskýrslur verða að hafa minnisblað við höndina og lesa af gaumgæfni yfir áður en vistað er.
