„Það var margt fínt hjá okkur,“ sagði Óskar Bjarni Óskarsson þjálfari Vals í samtali við handbolta.is í kvöld eftir 11 marka sigur á KA, 38:27, í fjórðu umferð Olísdeildar karla í handknattleik en um var að ræða fyrsta sigur Vals í deildinni á keppnistímabilinu.
Magnús Óli frábær
„Við náðum betri varnarleik en stundum áður og fengum betri sóknarleik. Magnús Óli var frábær og létti mjög róðurinn hjá okkur. Með honum fjölgar kostunum, jafnt í vörn sem sókn og léttir mjög undir með Viktori og Bjarna sem mikið hefur mætt á fram til þessa,“ sagði Óskar sem viðurkenndi að basl hafi verið á mörgum hjá Valsliðinu í fyrstu leikjunum enda skiluðu þeir fyrstu aðeins einu stigi.
Þurfum að tengja saman tvo sigra
„Stundum þarf samt ekki nema að vinna leik til þess að komast inn á sporið. Næsta skref hjá okkur er að tengja saman tvo sigurleiki,“ sagði Óskar Bjarni og bætti við að þrátt fyrir allt þá hafi Valsliðið verið nærri því að fá fleiri en eitt stig úr fyrstu leikjunum þremur.
„Það var karakter í okkur. Við höfum komist áfram með eitt og annað þótt sigrarnir hafi látið á sér standa fram til þess. Í kvöld þurftum við bara á sigri að halda, hvort hann yrði stór eða lítill skipti ekki öllu máli,“ sagði Óskar Bjarni sem telur að bæði Valur og KA eigi mikið inni.
Bæði eiga mikið inni
„Bæði lið verða betri þegar líður á keppninstímabilið. KA er að fá Bjarna Ófeig Valdimarsson sem mun spila sig betur inn í liðið eftir því sem leiktími hans lengist. Sömu sögu er að segja um línumanninn Kamil Pedryc sem þarf sinn tíma. Við vorum að fá Magnús Óla inn hjá okkur eftir meiðsli og nýi línumaðurinn okkar, Miodrag Corsovic, er að komast betur inn í hlutverk sitt. Allt tekur þetta sinn tíma,“ sagði Óskar Bjarni Óskarsson þjálfari Vals í samtali við handbolta.is í N1-höllinni í kvöld.
Valsmenn risu upp á afturfæturna
Staðan og næstu leikir í Olísdeild karla.
