Þriðja mánuðinn í röð er Ómar Ingi Magnússon, landsliðsmaður og leikmaður SC Magdeburg tilnefndur í kjöri á leikmanni mánaðarins í þýsku 1. deildinni í handknattleik.
Ómar Ingi hefur leikið einstaklega vel með SC Magdeburg á keppnistímabilinu en þó verið alveg sérdeilis góður eftir að keppni hófst á nýjan leik í febrúar eftir heimsmeistaramótið í Egyptalandi.
Ómar Ingi skoraði 46 mörk fyrir Magdeburg í leikjum maí mánaðar, 9,2 mörk að jafnaði í leik. Skotnýting hans var liðlega 74 af hundraði og nýting vítakasta var 82,1%.
Þótt Ómar hafi verið útnefndur sem leikmaður mars og apríl þá hefur hann ekki hreppt hnossið til þess en er ekki allt þá þrennt er?
Um þessar mundir er Ómar Ingi í öðru sæti á lista yfir markahæstu leikmenn þýsku 1. deildarinnar með 226 mörk. Hann er 14 mörkum á eftir Marcel Schiller hornamanni Göppingen. Ómar Ingi á leik til góða á Schiller.
