Arnór Þór Gunnarsson stýrði liði sínu, Bergischer HC, til sigurs á GWD Minden í æsispennandi leik í uppgjöri tveggja efstu liða næst efstu deildar þýska handknattleiksins á heimavelli í gærkvöld, 33:32. Bergischer HC hefur þar með unnið fimm fyrstu viðureignir sínar í deildinni og er eina taplausa liðið af þeim 18 sem eiga sæti í henni.
GWD Minden átti síðustu sókn leiksins í Unihalle, heimavelli Bergischer HC, en leikmönnum liðsins tókst ekki að skora jöfnunarmarkið. Tjörvi Týr Gíslason sá til þess en hann varði tvö skot í vörninni á síðustu sekúndunum, eftir því sem fram kemur í frásögn af leiknum.
Leikmenn Bergischer HC fögnuðu ákaft í leikslok ásamt liðlega 2.300 áhorfendum.
Bergischer HC féll úr efstu deild í vor og markmið Arnórs Þórs og samstarfsmanns hans, Markus Pütz, við þjálfun liðsins er að endurheimta á ný sæti í deild þeirra bestu.
Auk þess að láta til sín taka í vörninni þá skoraði Tjörvi Týr eitt mark en hann leikur í stöðu línumanns.
Stöðuna í þýsku 2. deildinni í handknattleik karla og í fleiri deildum evrópsks handknattleiks er að finna hér.
