„Mér fannst við vera betri en Framliðið í 40 mínútur af 60 að þessu sinni en það komu slæmir kaflar á milli, ekki síst í fyrri hálfleik þar sem við tókum slæmar ákvarðarnir og töpuðum boltanum sem varð til þess að við leyfðum Fram að hlaupa sín hraðaupphlaup. Þannig gáfum við þeim forskotið,“ sagði Halldór Stefán Haraldsson þjálfari KA í samtali við handbolta.is eftir sex marka tap KA fyrir Fram, 34:28, í sjöttu umferð Olísdeildar karla í handknattleik í Lambhagahöllinni í Úlfarsárdal.
Fram var með sex marka forskot í hálfleik, 19:13, eftir að hafa skotist fram úr á síðustu 10 mínútum. Í síðari hálfleik náði KA að minnka muninn í eitt mark oftar en einu sinni, síðast 23:22, þegar hálfleikurinn var u.þ.b. hálfnaður.
Sterkt að koma til baka
„Það var ótrúlega sterkt hjá okkur að koma til baka í síðari hálfleik og minnka muninn í eitt mark. Síðan misstum við tvo leikmenn af velli með skömmu millibili sem gerði okkur erfitt fyrir. Meðan við vorum í undirtölunni náði Fram að auka forskotið í fimm mörk. Þar með var leikurinn á ný orðin mjög erfiður fyrir okkur, við vorum ekki með krafta til þess að ná Framliðinu á nýjan leik,“ sagði Halldór Stefán þjálfari KA sem situr áfram neðst í Olísdeildinni með tvö stig eftir sex viðureignir.
Færumst skrefi nær
Halldór Stefán segir sína menn hafa verið skrefi nær andstæðingnum í kvöld sé tekið mið af útleikjunum við Val og Aftureldingu. „Við verðum að taka eitt til tvö skref til framfara í viðbót til að taka stig í þessum leikjum.“
Alltaf gott að leika heima
„Við eigum HK í KA-heimilinu í næstu umferð á fimmtudaginn. Það er alltaf gott að leika heima í KA-heimilinu og fá allan stuðninginn. Okkur líður vel og ég reikna ekki með öðru en við tökum eitt skref fram á við á fimmtudaginn,“ sagði Halldór Stefán Haraldsson þjálfari KA í samtali við handbolta.is í kvöld.
Staðan og næstu leikir í Olísdeildum.
