Aron Dagur Pálsson hefur gengið til liðs við HK og skrifað undir samning sem gildir út keppnistímabilið næsta vor. Hann kemur til HK frá Val en samningur hans við félagið rann sitt skeið á enda í sumar eftir tvö ár.
Aron er fjölhæfur sóknarleikmaður sem getur leyst nokkrar stöður auk þess að vera afar traustur varnarmaður. Hann ætti þar með að vera happafengur fyrir HK-liðið sem er í næst neðsta sæti Olísdeildar með þrjú stig eftir sex leiki. HK sækir KA heim annað kvöld í sjöundu umferð Olísdeildar og hver veit nema að Aron Dagur leiki þá í fyrsta sinn með Kópavogsliðinu.
Aron Dagur lék upp yngri flokka með Gróttu en gekk síðan til liðs við Stjörnuna en fór þaðan til Svíþjóðar og lék með Alingsås og Guif í úrvalsdeildinni. Hann var síðar seldur til Elverum í Noregi og varð meistari með liðinu vorið 2022.
Aron Dagur varð bikarmeistari með Val í mars og Evrópubikarmeistari í lok maí eftir frækinn sigur Valsmanna á Olympiakos.
Staðan og næstu leikir í Olísdeildum.
