Handknattleiksdómararnir Anton Gylfi Pálsson og Jónas Elíasson vöknuðu upp í Lissabon í morgun þar sem þeirra bíður í kvöld að dæma viðureign Sporting Lissabon og Füchse Berlin í 5. umferð A-riðils Meistaradeildar karla í handknattleik. Um er að ræða toppslag í riðlinum. Lið Berlínarrefanna situr í þriðja sæti með sex stig og er aðeins stigi á eftir portúgölsku meisturunum í Sporting sem tróna í efsta sæti riðilsins.
Fleiri Íslendingar kom við sögu í viðureigninni í Pavilhao Joao Rocha í Lissabon í kvöld. Orri Freyr Þorkelsson leikur með Sporting sem hefur gert það gott í keppninni til þessa.
Flautað verður til leiks í Pavilhao Joao Rocha klukkan 18.45 að íslenskum tíma.
Eftir því sem næst verður komist verður leikurinn í kvöld sá þriðji sem þeir Anton Gylfi og Jónas dæma í Meistaradeildinni á leiktíðinni. Þeir hafa dæmt um tug leikja í keppninni tímabil hvert undanfarin ár og getið sér gott orð fyrir frammistöðuna.