Hinn öflugi handknattleiksmaður FH, Jóhannes Berg Andrason, gat ekki leikið með liðinu í gærkvöld í sigurleiknum á IK Sävehof í Evrópdeildinni, 34:30, í Kaplakrika. Jóhannes Berg fékk þungt högg á aðra ristina í viðureign Gróttu og FH í Olísdeildinni síðasta föstudag. Hann hitaði aðeins upp fyrir leikinn í gær en fljótlega kom í ljós að ekki var hættandi á taka þátt.
FH á ekki leik í Olísdeildinni í vikunni. Viðureign FH og Hauka í áttundu umferð var flýtt og fór fram í lok september vegna leikja beggja liða í Evrópukeppni í þessari viku. FH leikur næst við IK Sävehof í Partille, nærri Gautaborg, á þriðjudaginn. Vonandi er að Jóhannes Berg hafi jafnað sig fyrir leikinn ytra.
Haukar eiga fyrir höndum ferð til Riihimäki í Finnlandi á föstudaginn vegna viðureignar við HC Cocks í Evrópubikarnum á laugardaginn. Þess vegna kom það sér ekki síður vel fyrir Hauka að flýta viðureigninni enda var það gert með samþykki forráðamanna beggja Hafnarfjarðarliðanna.
