Andri Már Ólafsson formaður handknattleiksdeildar Hauka segir að ljóst verði fyrir lok vikunnar hvort báðar viðureignir Hauka og Kur frá Aserbaísjan í 32-liða úrslitum Evrópubikarkeppni karla í handknattleik fari fram hér á landi eða í Mingachevir í Aserbaísjan. „Það eina sem er víst er að ekki verður leikið heima og að heiman. Hvorki við né forráðamenn Kur höfum áhuga á því. Þar af leiðandi verða báðir leikir annað hvort hér á Ásvöllum eða í Aserbaísjan,“ sagði Andri Már í samtali við handbolta.is.
„Ef leikirnir verða á Ásvöllum þá er víst að leikið verður 23. og 24. nóvember og viku síðar ef niðurstaðan verður að leika báða leikina í Aserbaísjan,“ sagði Andri Már. Íþróttamiðstöðin á Ásvöllum verður upptekin laugardaginn 30. nóvember enda einn af kjörstöðum í kosningum til Alþingis.
Upp kom sú hugmynd að mætast á miðri leið og leika báða leiki í Þýskalandi, svo dæmi sé tekið. Þegar allt kom til alls var ekki hljómgrunnur fyrir þeirri lausn.
Ekki einfalt ferðalag
Andri Már segir ekki einfalt að fara til Aserbaísjan en um 5.000 km eru á milli Íslands og Aserbaísjan. Vegna þess að ekki sé hættandi á að ferðast í gegnum Rússland þá verði að millilenda á tveimur stöðum á leiðinni til Bakú sem er við SV-strönd Kaspíahafs. Auk þess taki við hátt í 400 km rútuferð frá Bakú, höfuðborg Aserbaísjan, til borgarinnar Mingachevir þar sem Kur er með bækistöðvar.
Einnig er ljóst að um mjög dýrt verkefni er að ræða, hvort sem leikið verður í Hafnarfirði eða Mingachevir.
„Þetta er verkefni sem við verðum að leysa og það sem fyrst. Það verður ekki umflúið,“ sagði Andri Már Ólafsson formaður handknattleiksdeildar Hauka.
