Gróttumenn fóru illa að ráði sínu á heimavelli í kvöld þegar þeir misstu vænlega stöðu niður í tapaða gegn Val í viðureign liðanna í Olísdeild karla í handknattleik. Færeyingurinn Bjarni í Selvindi skoraði sigurmark Vals þegar þrjár sekúndur voru til leiksloka, 22:21. Nokkrum sekúndum áður hafði Björgvin Páll Gústavsson markvörður Vals varið skot frá Jóni Ómari Gíslasyni af línunni. Áður en Bjarni ko Val yfir í lokin hafði liðið ekki verið með forystu í leiknum síðan í stöðunni, 2:1.
Grótta var mest með sex marka forskot snemma í síðari hálfleik, 14:8. Valsmenn, sem voru ekki sjálfum sér líkir lengi vel leiksins, vöknuðu upp á síðasta stundarfjórðungi leiktímans og tókst að tryggja sér bæði stigin. Sóknarleikur Gróttu hrökk í baklás og Valsmenn gengu á lagið jafnt og þétt.
Þegar fyrri hálfleikur var að baki stóðu leikar, 12:8, fyrir Gróttu en segja má að leikmenn Vals hafi verið heillum horfnir í fyrri hálfleik.
Með sigrinum færðist Valur upp í annað sæti deildarinnar með 12 stig eftir níu leiki. Liðið komst upp á milli Aftureldingar og FH sem mætast að Varmá síðdegis á morgun í síðasta leik 9. umferðar.
Grótta er komin í 7. sæti eftir að hafa aðeins náð í eitt stig í síðustu fjórum viðureignum.
Staðan og næstu leikir í Olísdeildum.
Mörk Gróttu: Jakob Ingi Stefánsson 5, Jón Ómar Gíslason 4, Atli Steinn Arnarson 4, Lúðvík Thorberg Arnkelsson 3, Gunnar Hrafn Pálsson 2, Hafsteinn Óli Berg Ramos Rocha 1, Gunnar Dan Hlynsson 1, Kári Kvaran 1.
Varin skot: Magnús Gunnar Karlsson 16/1, 44,4% – Hannes Pétur Hauksson 0.
Mörk Vals: Úlfar Páll Monsi Þórðarson 6/4, Agnar Smári Jónsson 3, Bjarni í Selvindi 3, Viktor Sigurðsson 3, Miodrag Corsovic 2, Ísak Gústafsson 2, Björgvin Páll Gústavsson 1, Magnús Óli Magnússon 1, Allan Norðberg 1.
Varin skot: Björgvin Páll Gústavsson 8, 44,4% – Arnar Þór Fylkisson 5, 31,3%.
Tölfræði leiksins hjá HBStatz.
