Haukar fóru upp að hlið Fram með 10 stig eftir sjö umferðir með öruggum sigri á ÍBV í íþróttamiðstöðinni í Vestmannaeyjum í dag, 26:20, eftir að hafa verið tveimur mörkum yfir að loknum fyrri hálfleik, 12:10. ÍBV situr þar með áfram í fimmta sæti með sex stig eins og Selfoss sem er sjónarmun fyrir ofan.
Haukar hafa stundum átt erfitt uppdráttar gegn ÍBV í Eyjum en að þessu sinni var það ekki raunin.
Leiðir liðanna skildu eftir um tíu mínútur í síðari hálfleik. Varnarleikur Hauka riðlaði sóknarleik ÍBV-liðsins svo um munaði. Í framhaldinu fengu Haukar hraðaupphlaup sem skiluðu liðinu mörkum. Þegar 13 mínútur voru til leiksloka tók Sigurður Bragason þjálfari ÍBV síðasta leikhlé sitt sjö mörkum undir og reyndi að berja í brestina. Allt kom fyrir ekki.
Haukaliðið gaf ekkert eftir og náði mesta átta marka forskoti í að minnsta kosti tvígang.
Staðan og næstu leikir í Olísdeildum.
Mörk ÍBV: Birna Berg Haraldsdóttir 9/2, Sunna Jónsdóttir 4, Birna Dögg Egilsdóttir 2, Ásta Björt Júlíusdóttir 1, Alexandra Ósk Viktorsdóttir 1, Dagbjört Ýr Ólafsdóttir 1, Birna María Unnarsdóttir 1, Marta Wawrzykowska 1.
Varin skot: Marta Wawrzykowska 7, 21,9% – Bernódía Sif Sigurðardóttir 1, 50%.
Mörk Hauka: Rut Arnfjörð Jónsdóttir 7, Elín Klara Þorkelsdóttir 4/1, Inga Dís Jóhannsdóttir 4, Rakel Oddný Guðmundsdóttir 4, Ragnheiður Ragnarsdóttir 3, Sonja Lind Sigsteinsdóttir 2, Alexandra Líf Arnarsdóttir 1, Sara Odden 1.
Varin skot: Elísa Helga Sigurðardóttir 5/2, 27,8% – Margrét Einarsdóttir 4/1, 40%.
Tölfræði HBStatz.
