Guðmundur Bragi Ástþórsson skoraði fimm mörk, öll úr vítaköstum, þegar Bjerringbro/Silkeborg og TMS Ringsted skildu jöfn, 28:28, í Silkeborg í gær en leikurinn var liður í 10. umferð dönsku úrvalsdeildarinnar. Leikurinn var afar jafn og spennandi. Ringsted var marki yfir í hálfleik, 14:13.
Guðmundur Bragi kom Bjerringbro/Silkeborg yfir, 28:27, þegar hálf þriðja mínúta var til leiksloka.
Hvorki Arnór Viðarsson né Einar Þorsteinn Ólafsson skoruðu mörk þegar Fredericia HK gerði jafntefli við Mors-Thy, 33:33, í dönsku úrvalsdeildinni í handknattleik karla í gær.
Leikið var í Sparekassen Thy Arena. Arnór var ekki skráður á leikskýrslu. Einari Þorsteini var einu sinni vikið af leikvelli og gaf tvær stoðsendingar. Guðmundur Þórður Guðmundsson er þjálfari Fredericia.
GOG er efst í dönsku úrvalsdeildinni með 19 stig eftir 10 leiki. Aalborg Håndbold, Fredericia HK og Bjerringbro/Silkeborg eru jöfn að stigum í öðru til fjórða sæti með 15 stig hver.
Aalborg Håndbold vann Grindsted, 36:33, í gærkvöld en í gærmorgun var þjálfaranum Maik Machulla sagt upp störfum og Simon Dahl tók við.
Stöðuna í dönsku úrvalsdeildinni og fleiri deildum evrópsks handknattleiks er að finna hér.
