Ekkert hik er á forráðamönnum Kríu þessa dagana. Þeir stefna ótrauðir á að taka sæti í Olísdeild karla en liðið vann sér inn þátttökurétt í síðustu viku eftir umspilsleiki við Víking og Fjölni í undanúrslitum.
Lárus Gunnarsson þjálfari liðsins og einn forsvarsmanna staðfesti við handbolta.is í morgun að stefnt væri að þátttöku í Olísdeildinni í haust. Undirbúningur væri þegar hafinn og það af miklum krafti.
Eftir að Kría vann sér inn sæti í Olísdeildinni var gefið í skyn að svo kynni að fara að liðið afþakkaði keppnisréttinn. Nú virðist óvissan vera að baki og skýrt að lið Kríu blandi sér í slaginn í Olísdeildinni keppnistímabilið 2021/2022. Þar með verða tvö lið með heimilisfesti á Seltjarnarnesi í efstu deild karla á næsta keppnistímabili.
