Ívar Benediktsson skrifar frá München – [email protected]
„Segja má að við hefðum getað verið heppnari með andstæðing í 32-liða úrslitum. Á móti kemur þá er ferðalagið milli leikstaða auðveldara sem býður upp á að leika heima og að heiman sem er alltaf kærkomið í Evrópukeppni. Einnig gefst kostur á að bera okkur saman við öflugt sænskt lið með tvær íslenskar handknattleikskonur,“ sagði Ágúst Þór Jóhannsson þjálfari Íslandsmeistara Vals í handknattleik kvenna um væntanlega viðureign liðsins við Kristianstad í fyrri umferð 32-liða úrslita Evrópubikarkeppni í N1-höllinni á Hlíðarenda á morgun klukkan 16.30.
„Jóhanna leikur lykilhlutverk í liðinu. Hún er hafsent í mjög sterkri sex núll vörn og komið mjög vel út í því hlutverki. Auk þess leikur Jóhanna bæði í vinstri og hægri bakverði í sókninni, allt eftir hvað þarf á hverjum tíma. Jóhanna hefur einnig verið sterk í seinni bylgju hraðaupphlaupum.
Berta hefur leikið minna en Jóhanna í þeim leikjum sem ég hef séð. Vonandi fær Berta tækifæri á móti okkur enda er hún góður og frambærilegur leikmaður, bæði sem skytta og hornamaður hægra megin,“ sagði Ágúst Þór.
„Þess utan er Kristianstad með mjög spræka og góða sóknarleikmenn fyrir utan og afar góðan línu. Við verðum að ná toppleik til þess vinna heimaleikinn. Andstæðingurinn er sterkur, hvað sem hver segir,“ bætir Ágúst Þór Jóhannesson þjálfari Vals við ákveðinn í samtali við handbolta.is.
Kristianstad vann hollenska liðið Westfriesland SEW samanlagt með 19 marka mun, 67:48, heima og að heiman í 64-liða úrslitum.
Á sama tíma hafði Valur betur á móti Zalgiris Kaunas frá Litáen í tveimur leikjum á útivelli, 65:45.
Tvær íslenskar handknattleikskonur leika með Kristianstad, Berta Rut Harðardóttir og Jóhanna Margrét Sigurðardóttir en sú síðarnefnda er landsliðskona.
Kristianstad HK er í níunda sæti af 12 liðum í sænsku úrvalsdeildinni með fjögur stig að loknum sex leikjum.
