Molakaffi: Anton, Alexander, Vignir, Óskar, Guðni og Guðni, Björgvin, Andri, Orri og fleiri

- Auglýsing -

Anton Rúnarsson var útnefndur mikilvægasti leikmaður úrslitakeppni Olísdeildar karla í handknattleik sem lauk í gærkvöld með því að Anton og samherjar í Val tóku við Íslandsbikarnum eftir tvo sigurleiki á Haukum í úrslitum. Leikurinn í Schenkerhöllinni á Ásvöllum í gærkvöld var síðasti leikur Antons fyrir Val, alltént að sinni. Hann gengur til liðs við Emsdetten í þýsku 2. deildinni í sumar.
Fjórir leikmenn Valsliðsins sem varð Íslandsmeistari fyrir fjórum árum voru í leikmannahópi liðsins sem vann titilinn í gær. Það eru Alexander Örn Júlíusson, Anton Rúnarsson, Vignir Stefánsson og Þorgils Jón Svölu-Baldursson. Hlynur Morthens sem er markvarðaþjálfari liðsins var markvörður Valsliðsins sem varð meistari fyrir fjórum árum, Óskar Bjarni Óskarsson var og er í þjálfarateymi liðsins nú eins og þá eins og Guðni Jónsson liðsstjóri sem sjaldan er fjarri góðu gamni.
Björgvin Páll Gústavsson lék í gær sinn síðasta leik fyrir Hauka eftir eins árs veru. Hann gengur til liðs við Val í sumar. Eins eru uppi sögusagnir um að hinn markvörður Hauka, Andri Scheving Sigmarsson, verði ekki í herbúðum liðsins á næsta keppnistímabili. Eftir því sem næst verður komist mun Andri ganga til liðs við Aftureldingu. Fyrir nokkru var tilkynnt að Aron Rafn Eðvarðsson væri á heimleið og ætlaði að standa á milli stanganna hjá Haukum á næsta keppnistímabili. Eins er Stefán Huldar Stefánsson kominn aftur til Hauka eftir að hafa varið mark Gróttu í vetur.
Orri Freyr Þorkelsson kvaddi Hauka í gær. Hann samdi í byrjun maí við norska meistaraliðið Elverum og hyggst leika með því a.m.k. næstu tvö ár. Orri Freyr var markahæsti leikmaður Hauka á keppnistímabilinu. Hann skoraði 113 mörk í 19 leikjum í Olísdeildinni og 32 mörk í sex leikjum úrslitakeppninnar.
Brynjólfur Snær Brynjólfsson hóf leikinn fyrir Hauka í gær en fór snemma út af þegar ljóst var að meiðslin sem hann hlaut snemma í fyrri viðureigninni við Val á þriðjudag gerðu honum erfitt fyrir. Stefán Rafn Sigurmannsson var einnig með Haukum í gær þrátt fyrir meiðsli. Hann kom aðeins við sögu í einu vítakasti sem Martin Nágy, markvörður Vals, varði.
Forseti Íslands, Guðni Th. Jóhannesson, var á meðal áhorfenda á úrslitaleik Hauka og Vals í Schenkerhöllinni í gærkvöld ásamt börnum sínum og bróður, Patreki þjálfara Stjörnunnar. Patrekur stýrði Haukum til sigurs sem þjálfari á Íslandsmótinu 2015.
Aron Kristjánsson þjálfari Hauka fer til Barein á morgun til að búa landslið heimamanna undir þátttöku á Ólympíuleikunum sem fram fara í Japan og hefjast eftir liðlega mánuð.