Mosfellingurinn og landsliðsmaðurinn í handknattleik, Þorsteinn Leó Gunnarsson, átti stórleik með Porto í gærkvöld þegar liðið vann Póvoa AC Bodegão með 20 marka mun á heimavelli, 42:22, í portúgölsku 1. deildinni í handknattleik. Þorsteinn Leó skoraði níu mörk í 11 skotum og var markahæstur á vellinum.
Þorsteinn Leó er fjórði markahæsti leikmaður portúgölsku deildarinnar með 82 mörk eftir 15 leiki. Hann er 11 mörkum á eftir Delcio Ricardo Moreno Pina landsliðsmanni Grænhöfðaeyja og leikmanni Madeira Andebol Sad, sem er markahæstur. Þorsteinn Leó er á fyrsta keppnistímabili með Porto.
Með sigrinum komst Porto í efsta sæti deildarinnar með 43 stig eftir 15 leiki. Sporting, sem annar landsliðsmaður, Orri Freyr Þorkelsson leikur með, er einu stigi á eftir en á leik til góða. Sporting hefur unnið allar 14 viðureignir sínar til þessa.
Viðureign Lissabon-liðanna, Sporting og Benfica, var seinkað fram á mánudag. Stiven Tobar Valencia og félagar í Benfica eru í fjórða sæti.
Næsti leikur Þorsteins Leós og félaga í Porto verður gegn Nazaré Dom Fuas á útivelli á miðvikudagskvöld. Sama kvöld fær Sporting lið Belenenses í heimsókn og Benfica sækir heim SC Horta.
