Guðmundur Þórður Guðmundsson þjálfari danska úrvalsdeildarliðsins Fredericia HK hefur fengið ungverska markvörðurinn Martin Nagy til liðs við félagið í skamman tíma til að brúa bil vegna meiðsla markvarðanna Sebastian Frandsen og Thorsten Fries. Nagy lék með Val í Olísdeildinni tímabilið 2020/2021 og varð Íslandsmeistari með liðinu vorið 2021.
Nagy fór frá Val til Gummersbach sumarið 2021 og var undir handleiðslu Guðjóns Vals Sigurðssonar í tvö ár uns hann gekk til liðs við Pick Szeged í heimalandi sínu og hefur verið liðsfélagi Janusar Daða Smárasonar í vetur.
Nagy er þegar mættur í herbúðir Guðmundar Þórðar hjá Fredericia HK og verður í fyrsta sinn með liðinu í leik á morgun gegn Skjern í dönsku úrvalsdeildinni. Reiknað er með að Ungverjinn verði hjá Fredericia HK til ársloka.
Fredericia HK er í þriðja sæti dönsku úrvalsdeildarinnar með 19 stig fjórum stigum á eftir Aalborg Håndbold og GOG sem sitja í tveimur efstu sætunum.
