Nýja landsliðstreyjan í handknattleik mun ekki leynast í jólapökkum handboltaáhugafólks að þessu sinni. HSÍ tilkynnti í dag að ljóst sé orðið að treyjan verði ekki komin í sölu hér á landi í tæka tíð áður en síðustu jólagjafirnar verða keyptar. Vonir standa til þess að treyjurnar verði fáanlegar í smásölu áður en karlalandsliðið fer á heimsmeistaramótið upp úr miðjum janúar.
Ekki á vegum HSÍ
Salan á treyjunni og fleiri varningi tengdum búningi landsliðanna er ekki á vegum HSÍ heldur umboðsaðila Adidas hér á landi. Á þessu varð breyting þegar HSÍ samdi við annan íþróttavöruframleiðanda í vetur en áður hafði HSÍ séð um sölu búninganna.
„Ástæður þess að það tekst ekki að hefja söluna fyrir jól eru margvíslegar. Markmiðið er að hefja sölu áður en HM í janúar fer af stað. Við munum upplýsa um framvindu mála og tilkynna staðfesta dagsetningu fyrir sölu um leið og hún liggur fyrir,“ sagði Kjartan Vídó Ólafsson markaðsstjóri HSÍ við handbolta.is í dag.
