„Ef við horfum aðeins á úrslitin þá getum við verið sáttir við jafntefli við Svía á útivelli. Ég hefði samt viljað vinna leikinn eins og staðan var rétt fyrir leikslok en vissulega sveiflaðist leikurinn til og frá hjá okkur,“ sagði Snorri Steinn Guðjónsson í samtali við handbolta.is í kvöld eftir jafntefli við sænska landsliðið í fyrri vináttuleiknum í Kristianstad Arena í kvöld, 31:31.
Tapaðir boltar – hlaup til baka
„Margir fínir kaflar voru í leik okkar en á móti kemur að ég er óánægður með fjölda tapaðra bolta og eins fannst mér við vera slakir í að skila okkur til baka sem varð til þess að við fengum alltof mörg auðveld mörk á okkur. Þetta er eitthvað sem á að vera auðvelt að laga, ekki bara með því að skila sér betur til baka heldur með því að byrja að verjast fyrr,“ sagði Snorri Steinn ennfremur.
„Ég var ánægður með vörnina þegar við náðum að stilla henni upp, ekki síst framan af leiknum. Við duttum aðeins niður á síðustu mínútum.
Margar góðar lausnir
Sóknarleikurinn var fínn. Boltinn flaut vel og margar góðar lausnir litu dagsins ljós,“ sagði Snorri Steinn sem missti tvo af þremur línumönnum liðsins út úr leiknum. Elliði Snær Viðarsson fékk rautt spjald eftir 20 mínútur og Arnar Freyr Arnarsson meiddist illa eftir 13 mínútur í síðari hálfleik og kom ekkert meira við sögu eins og nánar er fjallað um hér.
Fá tækifæri á laugardaginn
Síðari viðureignin við Svía fer fram á laugardaginn í Malmö og hefst klukkan 15. Snorri Steinn segir að eitt og annað eigi liðið eftir að tefla fram. Tveir leikmenn komu t.d. ekkert við sögu í kvöld og síðan bætist nýr leikmaður inn í hópinn, Sveinn Jóhannsson línumaður.
„Þeir sem ekki spiluðu ekki í kvöld fá tækifæri á laugardaginn og síðan er ljóst að meiðsli Arnars Freys Arnarsson breyta einhverju hjá okkur,“ sagði Snorri Steinn Guðjónsson landsliðsþjálfari í samtali við handbolta.is í kvöld.
Lítur ekki vel út – Sveinn kallaður til Svíþjóðar
Jafntefli í Kristianstad – meiðsli Arnars áhyggjumál
