Íslenska landsliðið í handknattleik karla æfði af miklum móð í rúmlega 90 mínútur í æfingasal í úthverfi Zagreb síðdegis í dag enda aðeins tveir sólarhringar þangað til flautað verður til fyrsta leiks liðsins á heimsmeistaramótinu gegn landsliði Grænhöfðaeyja. Létt var yfir hópnum þótt alvaran blundaði undir niðri á meðal leikmanna, þjálfara og starfsmanna sem hlakka til að keppa á 29. heimsmeistaramótinu í karlaflokki.
Keppni hófst á HM í kvöld með fjórum leikjum, tveimur í Herning í Danmörku í B-riðli og tveimur í Poreč í Króatíu í C-riðli. Annað kvöld verður blásið til leiks A-riðli Herning í D-riðli í Varaždin, E-riðli Bærlum í Noregi og í H-riðli í Zagreb. Nánar er hægt að fræðast um leikjadagskrá HM hér.
HM karla fer í annað sinn fram í Króatíu en einnig er frændur okkar Danir og Norðmenn gestgjafar. Árið 2009 var HM karla fyrst haldið í Króatíu. Þá var íslenska landsliðið ekki með. Það var hinsvegar á meðal þátttökuliða á Evrópumóti sem haldið var í landinu fyrir sjö árum.
Hafliði Breiðfjörð ljósmyndari sat yfir æfingu landsliðsins síðdegis í dag. Hér fyrir neðan er brot af þeim fjölda mynda sem hann tók á æfingunni. (Smellið á myndirnar til þess að sjá þær stærri).
