„Mér fannst leikurinn eiginlega búinn eftir tíu mínútur. Við ætluðum okkur að reyna að halda fókus út leikinn og vinna eins og stórt hægt var, leika á fullu allan tímann. Það getur hinsvegar verið erfitt í þeim aðstæðum sem voru þegar þeir [leikmenn Grænhöfðaeyja] gerðu sér grein fyrir að þeir ættu ekki möguleika,“ sagði Bjarki Már Elísson landsliðsmaður í handknattleik í samtali við handbolta.is í Zagreb Arena í kvöld eftir 13 marka sigur, 34:21, á Grænhöfðaeyjum í fyrstu umferð riðlakeppni heimsmeistaramótsins í handknattleik karla.
„Auðvitað var eitt og annað sem við gátum gert betur. Það er alltaf sama klisjan með það,“ sagði Bjarki Már sem lék síðari hálfleikinn í vinstra horninu og skoraði þrjú mörk.
„Við erum bara einnþá á þeim stað sem lið að fækka þessum köflum og keyra yfir andstæðinganna og vinna með margra marka mun, ekki gefa þeim tækifæri til þess að komast inn í leikinn á nýjan leik. Við erum að þróast í rétta átt og ég er heilt yfir sáttur með stigin tvö,“ sagði Bjarki Már Elísson landsliðsmaður í handknattleik í samtali við handbolta.is í Zagreb Arena.
Lengra myndskeiðsviðtal er Bjarka Má hér fyrir ofan.
A-landslið karla – fréttasíða.
