Markakóngur þýsku 1. deildarinnar í handknattleik karla og leikmaður SC Magdeburg, Ómar Ingi Magnússon, var vitanlega valinn í úrvalslið deildarinnar sem kynnt var til sögunnar í morgun. Valið er enn ein rósin í hnappagat Ómars Inga eftir frábært keppnistímabil.
Hann er eini Íslendingurinn í liðinu.
Ómar Ingi lék einstaklega vel með SC Magdeburg á sinni fyrstu leiktíð með liðinu, ekki síst eftir áramótin. Hann var þrisvar valinn í lið mánaðarins á síðustu fimm mánuðum deildarkeppninnar.
Ómar Ingi skoraði 274 mörk í 38 leikjum SC Magdeburg í deildinni, fjórum mörkum fleiri en Marcel Schiller, vinstri hornamaður Göppingen, sem var næst markahæstur með 270 mörk. Bjarki Már Elísson, Lemgo, var þar á eftir.
Lið keppnistímabilsins getur að líta hér fyrir neðan.
