Alveg er orðið ljóst að umboðsaðili Adidas á Íslandi fær ekki sendingu af treyjum íslenska landsliðsins í handknattleik áður en heimsmeistaramótinu í handknattleik lýkur um næstu mánaðamót. Þetta kemur fram í yfirlýsingu sem Örvar Rudolfsson birtir á vef HSÍ í dag fyrir hönd Adidas á Íslandi. Hann er úrkula vonar.
Treyjur til Zagreb eftir helgina
Kjartan Vídó Ólafsson markaðsstjóri HSÍ sagði við handbolta.is að HSÍ eigi nokkur hundruð treyjur sem unnið er að því að merkja. Verða þær sendar út til Zagreb á miðvikudag og föstudag og seldar fyrir leikina í milliriðlakeppninni. Fyrsti leikur verður á miðvikudag.
Ljóst er að það er aðeins dropi í hafið en segja má að HSÍ sé að selja frá sér búningalager landsliðanna með von um að fá sendingu til eigin nota áður næstu verkefni landsliðsins bresta á.
Á hinn bóginn er alveg óvíst hvenær treyjan kemur í almenna sölu í verslunum. Innflytjandi og umboðsaðili Adidas virðist engu nær ef marka má tilkynningu hans á vef HSÍ og er birt hér fyrir neðan.
„Því miður náðust nýjar adidas treyjur íslenska handboltalandsliðsins ekki í sölu fyrir heimsmeistaramótið – og verða það líklega ekki heldur strax eftir mót.
Við héldum í vonina allt til þessa, í von um að eitthvað kraftaverk myndi breyta stöðunni, en því miður varð það ekki raunin.
Okkur þykir þetta mjög leitt og biðjumst velvirðingar á óþægindunum. Við munum láta vita um leið og treyjurnar verða fáanlegar í sölu.
Fyrir hönd Adidas á Íslandi,
Örvar Rudolfsson“.
