Snorri Steinn Guðjónsson, landsliðsþjálfari handknattleik hefur kallað Stiven Tobar Valencia inn í íslenska landsliðshópinn vegna meiðsla Bjarka Más Elíssonar. Bjarki Már er með rifu í vöðva aftan í hnésbótinni og verður frá í einhvern tíma. Hann hefur nánast ekkert tekið þátt í síðustu leikjum landsliðsins á HM.
Stiven Tobar, sem er vinstri hornamaður leikur með Benfica í Portúgal, var í landsliðinu á Evrópumótinu fyrir ári. Hann kemur til móts við íslenska hópinn í Zagreb í dag og getur orðið gjaldgengur með liðinu í kvöld. Um leið verður Stiven Tobar fimmti íslenski landsliðsmaðurinn á þessu móti til að leika í fyrsta sinn á HM. Hinir eru Einar Þorsteinn Ólafsson, Orri Freyr Þorkelsson, Sveinn Jóhannsson og Þorsteinn Leó Gunnarsson.
Stiven Tobar á að baki 17 A-landsleiki sem hann hefur skorað í 18 mörk.
Íslenska landsliðið mætir Króötum í annarri umferð milliriðlakeppninnar. Flautað verður til leiks í Zagreb Arena klukkan 19.30.
HM “25: Leikjadagskrá, milliriðlar, staðan
