„Sporin voru þung út af vellinum, nóttin og morguninn líka. Maður kannast aðeins of vel við þetta,“ segir Aron Pálmarsson fyrirliði íslenska landsliðsins í samtali við handbolta.is á hóteli landsliðsins í hádeginu í dag.
Lékum eins og þeir vildu
„Við lékum fyrri hálfleikinn nákvæmlega eins og þeir vildu. Það sem svíður er að við féllum í þá gryfju. Það með fór leikinn, eitt er að tapa boltanum og annað er að rétta þeim boltann. Þannig fengu þeir auðveld mörk,“ segir Aron og bætir við að sami hugur hafi ekki náðst upp eins og í tveimur fyrstu leikjunum. Um leið og mistökin hrönnuðust upp þá dró úr kjarkinum.
„Við hefðum þurft að vera sterkari andlega og betri handboltalega,“ segir Aron.
Ætla ekki að leyfa mér að vona
Aron segir ljóst að farið verði í leikinn við Argentínu á morgun til að vinna. Á hinn bóginn ætlar hann ekki gera sér einhverjar vonir um að liðið fái aðstoð með hagstæðum úrslitum í öðrum leikjum.
„Ég ætla ekki að leyfa mér að vona heldur vera vonlaus og ef eitthvað stórkostlegt gerist þá mætum við þeirri stöðu,“ segir Aron.
Lengra viðtal er við Aron í myndskeiði hér fyrir ofan.
