Nikolaj Jacobsen, þjálfari Ólympíu- og heimsmeistara Danmerkur segir í samtali við TV2 í heimalandi sínu ekki átta sig á af hverju er verið að halda Ólympíuleika við þær aðstæður sem eru í Japan um þessar mundir. „Ég hef það á tilfinningunni að leikarnir fari fram til þess að koma til móts við alla aðra en íþróttamennina,“ segir Jacobsen sem viðurkennir að vera orðinn hundleiður á að taka þátt í íþróttamótum þar sem leikmenn og þjálfarar eru meira og minna lokaðir inn á hótelherbergjum og leika í tómum íþróttahöllum.
Danska landsliðið er nú við æfingar á Okinawa-eyju fram í næstu viku að það fer inn í Ólympíuþorpið í Tókýó. Mjög strangar reglur gilda á Okinawa og má danska landsliðið t.d. ekki fara út af hótelinu og nýta sundlaugar í garði þess. Leikmenn verða að vera inni á herbergum alla daga fyrir utan þann tíma sem liðið er saman við æfingar í íþróttasal.
Jacobsen segir danska landsliðið alveg eins hafa geta sleppt því að vera á Okinawa og þess í stað farið strax til Tókýó og æft þar. Sóttvarnareglur séu síst strangari í Tókýó en á Okinawa-eyju. Hann og leikmenn hafi vonast til þess að hægt yrði að nýta vikudvöl á Okinawa við að hrista hópinn betur saman. Þess í stað þá eru leikmenn nánast læstir inni á hóteli og megi vart fara út af herbergjum sínum.
„Ég hreinlega átta mig ekki á tilganginum með að halda Ólympíuleika við þessar aðstæður sem eru fyrir hendi í Japan,“ segir Nikolaj Jacobsen, landsliðsþjálfari Dana í handknattleik karla.
Fyrsti leikur Dana á Ólympíuleikunum verður gegn Degi Sigurðssyni og lærisveinum hans í japanska landsliðinu 24. júlí.
