Danski handknattleiksdómarinn Jesper Madsen, fékk aðsvif seint í fyrri hálfleik í viðureign Vespzrém og Sporting Lissabon í Meistaradeild karla í handknattleik í Ungverjalandi í kvöld. Hné hann niður eftir af hafa reynt að standa í fæturna er hann gerðist reikull í spori. Leikmenn beggja liða ruku til og hlúðu að Madsen þangað til lækna og sjúkrþjálfara dreif að.
Var Madsen borinn af leikvelli og komið undir læknishendur. Samkvæmt fregnum TV2 í Danmörku var Madsen með meðvitund er hann var borinn að leikvelli.
Eftir samtöl á milli eftirlitsmanns, hins dómarans, Mads Hansen, og þjálfara beggja liða var ákveðið að Hansen dæmdi einn leikinn á enda enda ekkert varapar eða varadómari skráð á leikinn. Reyndi mjög á Hansen eins og nærri má geta enda um sannkallaðan háspennuleik að ræða sem lauk með eins marks sigri Veszrprém, 33:32.
Mads Hansen og Jesper Madsen eru reyndasta dómarapar Dana um þessar mundir og hafa dæmt hvert stórmótið á eftir öðru síðustu ár auk þess að vera í úrslitaleikjum í Meistaradeildinni.
Uppfært: TV2 í Danmörku hefur eftir Hansen dómara að Madsen félagi hans hafi ekki veikst alvarlega. Hann fer í fleiri rannsóknir áður en hann verður útskrifaður, vonandi á morgun.
