„Þetta var virkilega góður sigur í dag. Okkur tókst að keyra yfir þær í fyrri hálfleik. Þá small allt saman hjá okkur,“ sagði Sara Dögg Hjaltadóttir leikmaður ÍR í samtali við handbolta.is í dag eftir sigur ÍR á ÍBV, 34:30, í Olísdeild kvenna í Skógarseli. ÍR var yfir, 21:14, í hálfleik.
„Mér fannst allir nýta tækifæri sín vel og þetta var bara gaman,“ sagði Sara Dögg en ÍR-liðið hefur verið á fínni siglingu eftir áramótin og unnið hvern leikinn á fætur öðrum.
„Við höfum lagt mikla áherslu á að keyra upp mikið tempó í leikjum. Það er hlutur sem við erum góðar í. Samspilið hefur líka batnað hjá okkur og tímasetningar betri en áður. Einnig hefur varnarleikurinn okkar batnað,“ sagði Sara Dögg ennfremur.
Með sigrinum færðist ÍR upp að hlið Selfoss með 13 stig í fjórða til fimmta sæti. Selfoss á leik til góða.
„Framundan er bara skemmtileg keppni um fjórða sætið. Við stefnum á fjórða sætið. Það er ekkert leyndarmál,“ sagði Sara Dögg Hjaltadóttir leikmaður ÍR eldhress eftir sigurinn í dag.
Lengra viðtal við Söru Dögg er að finna í myndskeiði hér fyrir ofan.
ÍR-ingar eru komnir upp að hlið Selfyssinga
