Davíð Örn Hlöðversson hefur verið ráðinn aðalþjálfari karlaliðs Gróttu í handbolta til næstu þriggja ára. Davíð Örn tekur við liðinu af Róberti Gunnarssyni eftir að núverandi tímabili lýkur, en Davíð hefur verið aðstoðarþjálfari liðsins undanfarin þrjú keppnistímabil.
Gróttuliðið hefur undanfarin tvö tímabil endað í 9.sæti Olísdeildarinnar og verið nálægt úrslitakeppnissæti. Núna þegar fjórum leikjum er ólokið er Grótta í 10. sæti Olísdeildar og í mikilli baráttu, bæði um áframhaldandi veru í deildinni en líka um úrslitakeppnissæti. Mikill uppgangur hefur verið í handknattleik hjá Gróttu undanfarið en bæði karla- og kvennalið félagsins spila í efstu deild í vetur. Kvennalið Gróttu leikur til undanúrslita við Hauka í Poweradebikarnum á fimmtudagskvöld á Ásvöllum.
Þjálfað hjá félaginu í 20 ár
„Davíð er Gróttufólki vel kunnugur enda þjálfað hjá félaginu í 20 ár og því mikil gleðitíðindi innan félagsins að Davíð hafi skrifað undir samning um þjálfun meistaraflokks karla. Á sama tíma og stjórn handknattleiksdeildar Gróttu býður Davíð Örn velkominn í nýja stöðu vill stjórnin þakka Róberti fyrir gott og óeigingjarnt starf í þágu Gróttu undanfarin ár,“ segir m.a. í tilkynningu frá handknattleiksdeild Gróttu.
