- Auglýsing -
- Danir settu ólympíumet í fjölda marka þegar þeir skoruðu 47 mörk hjá japanska landsliðinu í gær í 1. umferð handknattleikskeppninnar. Fyrri met áttu Svíar og Frakkar en þeir síðarnefndu skoruðu 44 mörk í leik við Breta á Ólympíuleikunum í London fyrir níu árum. Svíar skoruðu 44 mörk hjá ástralska landsliðinu í Syndey 2000.
- Eins hafa ekki verið skoruð fleiri mörk í einum leik á Ólympíuleikum og í viðureign Dana og Japana í gær, 77. Fyrra met var 71 mark þegar Spánn vann Brasilíu, 36:35, á Ólympíuleikunum í Bejing 2008.
- Svíinn Hampus Wanne var eini leikmaðurinn í fyrstu umferð sem skoraði meira en einn tug marka í leik. Wanne skoraði 13 mörk þegar Svíar mörðu sigur á Barein, 32:31.
- Egyptar þóttu leika afar vel í gær þegar þeir lögðu Portúgala, 37:31, í B-riðli handknattleikskeppni Ólympíuleikanna. Yehia Elderaa, einn leikmanna egypska liðsins, sagði eftir leikinn að menn hefðu aðeins fundið reykinn af réttunum. Egypska liðið ætti eftir að leika ennþá betur á leikunum.
- Auglýsing -
