Tobias Karlsson fyrrverandi fyrirliði sænska landsliðsins tekur við starfi íþróttastjóra sænska karlalandsliðsins í vor. Hann á að vinna í nánu samstarfi við Michael Apelgren landsliðsþjálfara.
Lars Christiansen fyrrverandi landsliðsmaður Dana í handknattleik og leikmaður Flensburg-Handewitt um langt árabil hætti sem íþróttastjóri danska úrvalsdeildarliðsins KIF Kolding í sumar. Félagið þarf að draga saman seglin og stokka upp spilin. Uppsögn Christiansen er einn liður í sparnaði félagsins. Kolding er í mesta basli í botnbaráttu dönsku úrvalsdeildarinnar í karlaflokki.
Danski landsliðsmaðurinn Simon Pytlick brotnaði á hægri úlnlið í leik Flensburg og Fenix Toulouse í Evrópudeildinni í handknattleik á þriðjudagskvöld. Pytlick, sem var mikilvægur póstur í sigurliði Dana á HM fyrir fáeinum vikum verður mánuðum saman frá keppni.
Michał Skórski stýrir pólska landsliðinu í tveimur leikjum í undankeppni EM karla í næsta mánuði. Skórski hefur verið aðstoðarþjálfari landsliðsins undanfarin tvö ár auk þess að þjálfa ungmennalið Wisła Płock. Eftir að Marcin Lijewski sagði starfi sínu lausu eftir HM hefur pólska handknattleikssambandið ekki ráðið annan þjálfara en fór þess að leit við Skórski að hann verði með liðið í leikjunum við portúgalska landsliðið heima og að heiman 13. og 16. mars. Pólverjar hafa þrjú stig eftir tvær umferðir í áttunda riðli undankeppni EM 2026.
Franski handknattleiksmaðurinn Luka Karabatic hefur ákveðið að gefa ekki oftar kost á sér í landsliðið. Hann er 36 ára gamall hefur átt sæti í landsliðinu meira og minna í 14 ár og unnið allt sem landsliðsmaður getur unnið. Karabatic var um skeið fyrirliði en var settur af síðla á síðasta ári. Eldri bróðir Luka, Nikola Karabatic, lagði keppnisskóna á hilluna eftir Ólympíuleikana á síðasta ári.
