„Þetta einstaklega sætt og ótrúlega skemmtilegt,“ var það fyrsta sem Þórey Rósa Stefánsdóttir leikmaður Fram sagði í kvöld þegar handbolti.is hitti hana eftir að Fram vann Val í undanúrslitum Poweradebikarsins í handknattleik kvenna á Ásvöllum í kvöld, 22:20.
„Það er æðislegt að fá annan leik á laugardaginn,“ sagði Þórey Rósa sem lék síðast í úrslitum bikarkeppninnar með Fram 2022 og tapaði þá fyrir Val, 25:19.
„Leikurinn var hálfgerður naglbítur en það gerði sennilega gæfumuninn að við náðum fjögurra marka forskoti þegar á leið síðari hálfleik. Slíkt forskot getur verið erfitt að vinna upp. Okkur tóst sem betur fer að halda sjó þótt tæpt stæði á síðustu mínútunni,“ sagði Þórey Rósa ennfremur. Síðar í kvöld skýrist hvort Fram mætir Gróttu eða Haukum í úrslitaleiknum á laugardaginn sem hefst klukkan 13.30 á Ásvöllum.
„Ég hef fundið það alla vikuna að sú stund væri að renna upp að við værum að fara taka þetta. Við þurfum bara allar að hafa trú á að við getum farið alla leið,“ sagði Þórey Rósa Stefánsdóttir leikmaður Fram í samtali við handbolta.is.
Lengra viðtal við Þóreyju Rósu er í myndskeiði hér fyrir ofan.
Framarar settu Valsliðinu stólinn fyrir dyrnar – Zecevic átti stórleik
Alltof margar sem voru ekki á sínum degi – aragrúi marktækifæra fór í súginn
