„Ég er bara meyr. Það er erfitt að lýsa þeirri tilfinningu sem fer um mann. Þetta er ekki eitthvað sem maður gengur í gegnum á hverju ári,“ sagði Einar Jónsson þjálfari bikarmeistara Fram í samtali við handbolta.is í kvöld eftir að hann stýrði Fram til sigurs í Poweradebikarnum með sigri á Stjörnunni í úrslitaleik á Ásvöllum, 31:25.
Einar er a.m.k. annar þjálfarinn sem vinnur bikarmeistaratitil bæði í kvenna- og karlaflokki. Einar var þjálfari kvennaliðs Fram sem vann bikarkeppnina 2010 og 2011. Staðfest er að Erlingur Richardsson hefur unnið þetta afrek. Erlingur stýrði kvennaliði ÍBV til sigurs í bikarkeppninni 2002 og karlaliði félagsins 18 árum síðar.
Uppskerum eins og til hefur verið sáð
„Við erum að uppskera eins og við höfum sáð til,“ sagði Einar en lið hans hefur á að skipa hópi ungra handknatteiksmanna.
„Við fórum vel yfir það fyrir leikinn að við yrðum að vinna okkar starf og vera agaðir. Við vorum það í 90% af leiknum. Leikurinn var engin flugeldasýning af okkar hálfu hvað sóknarleikinn varðar en varnarleikurinn var mjög góður. Á heildina litið vorum við agaðir. Við spiluðum eins og gott handboltalið,“ sagði Einar.
„Ég fann það aðeins á strákunum að spennustigið var hátt. Við vorum afslappaðri í fyrri leiknum [undanúrslitaleiknum],“ sagði Einar sem fann ekki fyrir pressu eftir að kvennalið Fram tapaði fyrr í dag í úrslitaleiknum í Poweradebikar kvenna.
Lengra viðtal við Einar er í myndskeiði hér fyrir ofan.
Greinin hefur verið uppfærð.
Framarar fóru kampakátir frá Ásvöllum
Poweradebikarinn – fréttasíða.
