Nokkur afföll hafa verið í landsliðshóp kvenna í handknattleik sem Arnar Pétursson landsliðsþjálfari valdi á dögunum og er við æfingar þessa vikuna. Þess vegna voru Alexandra Líf Arnarsdóttir úr Haukum og Stjörnukonan Embla Steindórsdóttir kallaðar inn á æfingar í vikunni til viðbótar við aðra leikmenn sem eru við æfingar.
Umspil HM eftir mánuð
„Það hefur verið mikið álag á nokkrum leikmönnum síðustu vikur,“ sagði Arnar Pétursson sem var án sjö leikmanna af 22 á æfingu í fyrradag. Hann reiknar með að einhverjar af þeim verði með á æfingum síðar í vikunni. Æfingarnar þessa vikuna eru liður í undirbúningi fyrir leiki gegn ísraelska landsliðinu í umspili um HM sæti sem fram fara hér á landi 9. og 10. apríl.
„Þær sem glíma við meiðsli hafa verið og verða í meðferð hjá sjúkrateymi okkar í vikunni sem vonandi skilar árangri ásamt hléi frá keppni,“ sagði Arnar ennfremur.
„Við nýtum dagana eins vel og kostur er og gerum það besta úr stöðunni. Mestu máli skiptir að við verðum með okkar besta lið þegar kemur að leikjunum eftir mánuði því markmið okkar er skýrt; að tryggja okkur inn á HM,“ sagði Arnar Pétursson landsliðsþjálfari kvenna í samtali við handbolta.is.
