„Ég kann vel við mig í Grikklandi, hef ekki yfir neinu að kvarta,“ segir Andri Már Rúnarsson landsliðsmaður í handknattleik sposkur á svip fyrir æfingu íslenska landsliðsins í Chalkida síðdegis í dag. Andri Már var valinn í landsliði fyrir leikinn gegn Grikkjum á miðvikudaginn en um ár er síðan hann var síðast í landsliðinu og þá einnig í leikjum við Grikki. Þá var um að ræða vináttuleiki. Þar áður var hann með U21 ár landsliðinu á HM sumarið 2023.
„Það er bara mjög gaman að vera kallaður inn í hópinn að þessu sinni. Ég er spenntur fyrir að taka þátt í þessu verkefni. Samkeppnin er mikil í landsliðnu. Núna fær maður tækifæri til þess að sýna sig og sanna,“ segir Andri Már sem mætir fullur sjálfstrausts eftir að hafa fengið mikil tækifæri með Leipzig í þýsku 1. deildinni á leiktíðinni.
„Ég hef spilað mikið og lært margt. Að leika í þýsku deildinni er það skemmtilegasta sem maður gerir,“ segir Andri Már sem samdi við Leipzigliðið í kjölfar vasklegrar framgöngu með 21 árs landsliðinu þegar það hafnaði í þriðja sæti á HM sumarið 2023. Mót sem hófst í Grikklandi en lauk í sumarblíðu Berlín í Þýskalandi.
Lengra viðtal við Andra Má er í myndskeiði ofar í þessari frétt.
