Aldís Ásta Heimisdóttir og liðsfélagar í Skara HF halda áfram að gera það gott í sænsku úrvalsdeildinni í handknattleik. Skara færðist upp í annað sæti deildarinnar í kvöld með stórsigri á Höörs HK H 65, 33:19, á heimavelli. Leikmenn Höör virtust hafa tekið skakkan pól í hæðina í upphafi leiks því leikur liðsins var í molum allan fyrri hálfleikinn og staðan var 16:4, fyrir Skara eftir 30 mínútur.
Mætti galvösk til leiks
Aldís Ásta sem var frá keppni um skeið mætti galvösk til leiks í kvöld. Hún skoraði þrjú mörk úr fimm skotum, átti eina stoðsendingu og var einu sinni vikið af leikvelli.
Á sama tíma tapaði Skuru, sem var í öðru sæti fyrir Ystads, og þar með fleytti sigurinn Skara upp í annað sæti með 28 stig. Sävehof, sem Elín Klara Þorkelsdóttir samdi við á dögunum, er efst með 31 stig að loknum 20 leikjum. Skuru er stigi á eftir Skara með 27 stig og Höör-liðið situr í fjórða sæti með 25 stig og veit ekki sitt rjúkandi ráð eftir fyrri hálfleikinn í Skara í kvöld.
Vinsælt lesefni:
