„Við reiknum með góðu liði sem er vel samspilað,“ segir Ýmir Örn Gíslason landsliðsmaður í handknattleik í samtali við handbolta.is í Chalkida í Grikklandi um viðureignina sem framundan er við landslið heimamanna í kvöld í undankeppni EM 2026. Grikkir unnu Georgíumenn með eins marks mun, 27:26, í fyrstu umferð undankeppninni í byrjun nóvember.
„Við höfum náð tveimur til þremur æfingum saman og mér líst bara vel á strákana sem eru að koma nýir inn í liðið. Það verður einfaldlega spennandi að sjá hvernig okkur gengur og hvernig leikurinn mun þróast,“ segir Ýmir Örn sem leikur í kvöld sinn 101. landsleik.
„Grikkir eru með góða leikmenn, spila þétta og góða vörn og hafa góða markverði. Þeir hanga svolítið á boltanum en gera það vel. Þetta verður væntanlega þolinmæðisverk hjá okkur á útivelli. Það getur allt skeð,“ segir Ýmir Örn Gíslason landsliðsmaður í samtali við handbolta.is í gær.
Lengra viðtal við Ýmir Örn er í myndskeiði hér fyrir ofan.
Leikur Grikklands og Íslands hefst klukkan 17 að íslenskum tíma í dag. Síðari viðureignin fer fram á laugardaginn í Laugardalshöll og hefst klukkan 16. Miðasala er midix.is.
A-landslið karla – fréttasíða.
