Georgíumenn, sem er með Íslandi í riðli í undankeppni EM karla 2026 eru komnir á blað í 3. riðli í undankeppninni eftir að þeir lögðu Bosníumenn, 28:26, í Tbilisi Arena í dag í síðari viðureign þriðju umferðar riðilsins. Eftir sigurinn í dag eru Georgíumenn, Grikkir og Bosníumenn jafnir að stigum í öðru til fjórða sæti með 2 stig hvert.
Íslenska liðið er efst með fullt hús stiga, sex stig, eftir leikina þrjá, þann síðasta í Chalkida í Grikklandi í gær, 34:25.
Ómögulegt er að segja hvaða af liðunum þremur fylgir íslenska liðinu áfram í lokakeppni EM. Hugsanlegt er að þriðja liðið fljóti með en fjögur af átta liðum sem hafna í þriðja sæti fljóta með inn á EM.
Leikurinn í georgísku höfuðborginni var jafn og spennandi frá upphafi til enda. Heimamenn voru marki yfir í hálfleik, 15:14. Lið þjóðanna mætast á nýjan leik í Gazin í Bosníu á sunnudagskvöld.
Giorgi Tskhovrebadze, liðsfélagi Elliða Snæs Viðarssonar hjá Gummersbach var markahæstur í georgíska liðinu með 11 mörk og var með fullkomna skotnýtingu. Teimuraz Orjonikidze var næstur með sex mörk.
Mislav Grgic var atkvæðamestur hjá landsliði Bosníu með 10 mörk.
Úrslit og stöðuna í riðlunum er að finna í greininni hér fyrir neðan auglýsinguna en fleiri leikir fara fram í undankeppni EM karla í kvöld.
