Aldís Ásta Heimisdóttir skoraði þrjú mörk og Jóhanna Margrét Sigurðardóttir tvö þegar lið þeirra Skara HF tapaði með sex marka mun fyrir H 65 Höör, 27:21, í fyrsta leik liðanna í átta liða úrslitum sænsku úrvalsdeildarinnar í handknattleik í kvöld. Leikurinn fór fram í Höör.
Liðin mætast öðru sinni í Skara á sunnudaginn. Komi til oddaleiks fer hann fram í Höör 15. apríl.
Fyrirfram var vitað að við ramman reip yrði að draga hjá leikmönnum Skara sem höfnuðu í sjöunda sæti úrvalsdeildarinnar. Höör-liðið varð á hinn bóginn í öðru sæti. Heimaliðið var fjórum mörkum yfir í hálfleik, 14:10.
Jóhanna Margrét átti tvær stoðsendingar en Aldís Ásta eina.
Aðrir leikir í fyrstu umferð átta liða úrslita
Sävehof – Kungålvs 38:16.
Västerås – Skuru 29:28.
Önnereds – Skövde 28:24.
