Íslenska landsliðið í handknattleik æfði í 80 mínútur í kristalshöllinni, Kristalna Dvorana, í Zrenjanin í Serbíu í dag fyrir leikinn mikilvæga við landslið Serbíu sem fram fer í keppnishöllinni á morgun. Úrslit leiksins skera úr um hvort þjóðin sendir keppnislið í lokakeppni Evrópumótsins sem fram fer í nóvember.
Allir 17 leikmenn íslenska lansliðshópsins tók þátt í æfingunni, þar á meðal Elín Jóna Þorsteinsdóttir sem glímt hefur við meiðsla sem hún varð fyrir í viðureigninni við Svía á Ásvöllum á miðvikudagskvöld.
Eftir langan dag í gær fengu leikmenn að hvílast fram eftir morgni. Að loknum morgunverði tók við gönguferð og fundur þar sem lagt var á ráðin fyrir leikinn á morgun. Á æfingunni í dag var farið vel yfir helstu atriði jafnt í vörn sem sókn.
Ekki var hægt að kvarta yfir kulda í keppnishöllinni á meðan á æfingunni stóð, fremur að þar inni væri of heitt. Reikna má með að svipað verði upp á teningnum á morgun þegar leikurinn fer fram en hann hefst klukkan 16, eða 18 að staðartíma.
Kristall er lítt sjáanlegur en þeim mun meira er um gler í keppnishöllinni sem er öll klædd gleri. Bygging hallarinnar hófst 2006 og var lokið þremur árum síðar fyrir sumarleika háskólafólks. Keppt var í höllinni á heimsmeistaramóti kvenna sem fram fór í Serbíu 2013 og eins á Evrópumóti kvenna í körfuknattleik 2019.
Kristalshöllin rúmar 2.800 áhorfendur í sæti og mikil gryfja með bröttum stúkum á báðum langhliðum auk þess sem sæti eru á skammhliðinni fyrir aftan annað markið. Um 1.000 áhorfendur mættu á sigurleik Serba á Tyrkjum í október, 36:27, um 2.000 manns voru viðstaddir viðureign Serba og Svía í mars, 24:21.
Hér fyrir neðan eru nokkra myndir frá æfingunni í dag.
![](https://www.handbolti.is/wp-content/uploads/2022/04/278697201_4851058021686752_2899426854648651210_n-1024x683.jpg)
![](https://www.handbolti.is/wp-content/uploads/2022/04/278376759_492937209153580_1826349138255087788_n-1024x683.jpg)
![](https://www.handbolti.is/wp-content/uploads/2022/04/278661943_531515875275339_96357694603191086_n-1024x683.jpg)
![](https://www.handbolti.is/wp-content/uploads/2022/04/278654899_1148267272602514_6314195175076993147_n-1024x683.jpg)
![](https://www.handbolti.is/wp-content/uploads/2022/04/278828169_469985418144839_4059296735067744813_n-1024x683.jpg)
![](https://www.handbolti.is/wp-content/uploads/2022/04/278896290_715510189631660_8178206616657983997_n-1024x683.jpg)
![](https://www.handbolti.is/wp-content/uploads/2022/04/278863656_503381221489373_8035488789177593933_n-1024x683.jpg)
![](https://www.handbolti.is/wp-content/uploads/2022/04/278841900_683938316164148_2977306981778799628_n-1024x683.jpg)
![](https://www.handbolti.is/wp-content/uploads/2022/04/278852099_1426050607815437_6299249666827994215_n-1024x683.jpg)
![](https://www.handbolti.is/wp-content/uploads/2022/04/278651964_706914903867085_2388438685123689924_n-1024x683.jpg)
![](https://www.handbolti.is/wp-content/uploads/2022/04/278716764_448599513734683_460359306129459135_n-1024x683.jpg)