Andri Snær Stefánsson, þjálfari KA/Þórs, sagði í samtali við handbolta.is að liðið hafi leikið undir pari í síðari hálfleik í gær gegn ÍBV í fyrstu viðureign liðanna í undanúrslitum Olísdeildar kvenna í KA-heimilinu. KA/Þór tapaði leiknum, 27:26, eftir að hafa verið þremur mörkum yfir að loknum fyrri hálfleik, 14:11. Hann segir ekki koma til greina að deildarmeistararnir fari í sumarfrí eftir leikinn í Vestmannaeyjum á miðvikudaginn. Til Eyja fari KA/Þórs liðið aðeins með eitt markmið; að vinna.
„Við spiluðum vel í fyrri hálfleik þar sem vörnin var góð og markvarslan fylgdi vel með. Í seinni hálfleik fengum við á okkur 16 mörk sem er of mikið. Við réðum illa við Hrafnhildi [Hönnu Þrastardóttur] og Ástu [Björt Júlíusdóttur] sem röðuðu mörkunum á okkur,“ sagði Andri Snær.
Undir pari en áttum möguleika
„Á sama tíma hikstuðum við í sókninni og fórum með full mikið af góðum færum í bland við að flæðið á boltanum var of hægt í sókninni.
Við vorum einfaldlega undir pari á öllum sviðum í seinni hálfleik en vorum alltaf í góðum möguleika í leiknum. Svona er úrslitakeppnin. ÍBV hitti á daginn sinn,“ sagði Andri Snær sem þegar er farinn að leggjast yfir næsta leik í undanúrslitunum sem KA/Þór verður einfaldlega að vinna til að ná fram uppgjöri í oddaleik í KA-heimilinu á laugardaginn.
Förum vel yfir okkar leik
„Nú þurfum við að leggjast vel yfir okkar leik fyrir miðvikudaginn. Það var boðið upp á skemmtilega handboltastemningu í dag og ég býst við að það verði fullt af orku í húsinu í Eyjum á miðvikudag. Við verðum tilbúin í slaginn það er alveg á hreinu. Við ætlum ekki strax í sumarfrí,“ sagði Andri Snær Stefánsson, þjálfari deildarmeistara KA/Þórs, ákveðinn við handbolta.is í gærkvöld.
