- Auglýsing -
Til stóð að ungmennalið Selfoss og Hauka leiddu saman hesta sína í Grill66-deild karla í handknattleik í Sethöllinni í kvöld. Skömmu áður en leikurinn átti að hefjast var honum slegið á frest vegna smita kórónuveiru á Selfossi. Er um að ræða einn anga tengdan smitum sem komið hafa upp í tengslum við framhaldsskólann, FSu, í bænum.
Leikmenn Hauka voru komnir austur þegar gripið var til þess ráðs að fresta leiknum.
Þetta er ekki fyrsti leikurinn á leiktíðinni í Grill66-deildinni sem verður að bíða betri tíma vegna veirunnar sem enn er á sveimi í samfélaginu. Skammt er síðan að tveimur leikjum Fjölnis í Grill66-deildinni var frestað eftir að kórónveiran knúði dyra á búningsklefa karlaliðs félagsins.
Óvíst er hvenær viðureign ungmennaliða Selfoss og Hauka verður á dagskrá.
- Auglýsing -
