Í annað sinn á skömmum tíma kom hörmulegur upphafskafli þýska landsliðinu í koll á heimsmeistaramóti kvenna þegar liðið mætti hollenska landsliðinu í dag í leiknum um fimmta sætið á heimsmeistaramótinu. Þýska liðið skoraði ekki mark fyrr en eftir rúmar 14 mínútur gegn Svíum í átta liða úrslitum á dögunum. Gegn Hollandi í dag náði þýska liðið ekki að koma boltanum í hollenska markið fyrr en eftir hálfa þrettándu mínútu.
Þessi afleita byrjun setti sannarlega mark sitt á leikinn sem Hollendingar unnu, 30:26, eftir að hafa slakað verulega á klónni á síðustu mínútunum. Forskot hollenska liðsins var níu mörk að loknum fyrri hálfleik, 16:7, í Jyske Bank Boxen íþróttahöllinni glæsilegu í Herning á Jótlandi þar sem leikið verður um heimsmeistaratitilinn í kvöld.
![](https://handbolti.is/wp-content/uploads/2023/12/GERvsNED4.png)
Þetta er í fimmta sinn í sögu heimsmeistaramóta kvenna sem Holland hafnar í einu af fimm efstu sætum mótins og í fyrsta skipti síðan lið þjóðarinnar varð heimsmeistari í Japan fyrir fjórum árum. Holland vann átta leiki á HM en tapaði einum, gegn Noregi í átta liða úrslitum.
Þýskaland tapaði þremur af fjórum síðustu viðureignum sínum á HM að þessu sinni og hreppir 6. sætið sem er besti árangur Þjóðverja á HM frá 2007 þegar bronsið kom í þeirra hlut.
Mörk Hollands: Angela Malestein 7, Bo Van Wetering 5, Larissa Nüsser 5, Laura Van Der Heijden 3, Yvette Broch 2, Tamara Haggerty 2, Dione Housheer 2, Kelly Vollebregt 1, Yara Ten Holte 1, Inger Smits 1, Catharina Molenaar 1.
Varin skot: Yara Ten Holte 17, 44% – Tess Lieder 0 – Rinka Duijndam 0.
Mörk Þýskalands: Antje Döll 7, Alina Grijseels 6, Jenny Behrend 4, Julia Behnke 3, Johanna Maria Stockschläder 2, Emily Bölk 2, Lisa Carolin Antl 1, Mareike Thomaier 1.
Varin skot: Sarah Wachter 11, 35% – Katharrina Filter 0.