Norðmenn ætla að tefla fram B-landsliði karla í undankeppni EM í næsta mánuði, líkt og þeir gerðu í byrjun janúar. Norska karlalandsliðið á leik við Lettland í 6. riðli undankeppni EM miðvikudaginn 10. mars. Tveimur dögum seinna hefst forkeppni Ólympíuleikanna. Norska landsliðið á sæti í henni.
Christian Berge segir að ekki komi til greina að A-landsliðið leiki fjóra leiki á fimm dögum. Hann hefur þess vegna ákveðið að B-landsliðið leiki við Letta í undankeppni EM miðvikudaginn 10. mars. Norðmenn stilltu upp B-landsliðinu í byrjun janúar í tveimur leikjum gegn Hvít-Rússum í undankeppni EM og tókst að vinna aðra viðureignina. Leikirnir féllu ekki að undirbúningi norska landsliðsins fyrir heimsmeistaramótið sem haldið var í Egyptalandi.
Til stóð að leikir norska landsliðsins í forkeppni Ólympíuleikanna færu fram í Noregi en vegna strangra reglna um sóttvarnir í landinu ákvað Alþjóða handknattleikssambandið á dögunum að færa keppnina enda útlokað að krefja þátttökuliðin að vera í 10 daga sóttkví í Noregi áður en flautað verður til leiks.
Frá Noregi til Svartfjallalands
Í morgun greindi IHF frá því að forkeppnisriðill Noregs fyrir Ólympíuleikanna fari fram í Podgorica í Svartfjallalandi þótt karlalandslið Svartfellinga taki ekki þátt. Landslið Noregs, Brasilíu, Chile og Suður-Kóreu verða þar með að fara til Svartfjallalands og reyna þar með sér í keppni um tvo farseðla í handknattleikskeppni Ólympíuleikanna sem fram eiga að fara í Japan í sumar.
