Afturelding leikur til úrslita á Ragnarsmótinu í handknattleik karla á laugardaginn eftir að hafa unnið báða leiki sína á mótinu til þessa. Mosfellingar unnu KA, 34:30, í Sethöllinni á Selfossi í kvöld. KA leikur að öllum líkindum um 5. sætið en Akureyrarliðið hefur tapað báðum leikjum sínum í mótinu.
Staðan var jöfn, 25:25, þegar 13 mínútur voru til leiksloka. Eftir það tóku Aftureldingarmenn frumkvæðið og unnu öruggan sigur. Að loknum fyrri hálfleik var tveggja marka munur á liðunum, 19:17, Aftureldingarmönnum í vil.
Afturelding tefldi fram svartfellskum miðjumanni í leiknum, Nemanja Vukovic, en hann er um þessar mundir til reynslu hjá félaginu. Eftir því sem næst verður komist hefur ekki verið tekin ákvörðun um hvort við hann verður samið eður ei.
Þorsteinn Leó Gunnarsson, leikmaður Aftureldingar, hlaut þungt högg í leiknum og er jafnvel óttast að hann hafi brákað rifbein, eftir því sem handbolti.is hefur hlerað.
Mörk KA: Einar Rafn Eiðsson 11, Allan Norðberg 5, Gauti Gunnarsson 4, Dagur Gautason 3, Patrekur Stefánsson 3, Dagur Árni Heimisson 2, Arnór Ísak Haddsson 1, Jóhann Geir Sævarsson 1.
Varin skot: Bruno Bernat 9.
Mörk Aftureldingar: Árni Bragi Eyjólfsson 8, Einar Ingi Hrafnsson 5, Úlfar Páll Monsi Þórðarson 5, Blær Hinriksson 4, Nemanja Vukovic 3, Stefán Magni Hjartarson 2, Þorsteinn Leó Gunnarsson 2, Sveinn Aron Sveinsson 2, Bergvin Þór Gíslason 1, Böðvar Páll Ásgeirsson 1, Pétur Júníusson 1.
Varin skot: Jovan Kukobat 8.
Annað kvöld mætast ÍBV og Hörður á Ragnarsmótinu í Sethöllinni á Selfossi. Flautað verður til leiks klukkan 18.30. Að viðureigninni lokinni skýrist hvaða lið mætir Aftureldingu í úrslitaleik á laugardaginn klukkan 16.
