Aftureldingu tókst að merja út sigur á Fram á síðustu mínútum í hörkuleik liðanna í Úlfarsárdal í kvöld í 3. umferð Olísdeildar karla, 32:30. Leó Snær Pétursson og Árni Bragi Eyjólfsson skoruðu tvö síðustu mörk leiksins og Jovan Kukobat varði skot í marki Mosfellinga. Þegar þetta lagðist á eitt á síðustu mínútunum féll sigurinn Afureldingu í skaut. Kukobat var öflugur í markinu á endaspretti leiksins.
Fram var tveimur mörkum yfir að loknum fyrri hálfleik, 14:12. Framarar voru sterkari lengi vel í síðari hálfleik og náðu hvað eftir annað fjögurra marka forskoti. Aftureldingarmenn lögðu ekki árar í bát þrátt fyrir mótlætið og tókst loksins að jafna, 27:27, þegar sex mínútur voru til leiksloka. Eftir það var leikurinn í járnum að mestu leyti.
Í frásögn mbl.is frá leiknum segir að Marko Coric hafi brotið afar harkalega á Þorsteini Leó Gunnarssyni leikmanni Aftureldingar á 54. mínútu leiksins. Coric hafi sloppið með skrekkinn frá því broti með tveggja mínútna brottvísun.
Afturelding hefur þar með unnið tvo leiki í röð og unnið sér inn fjögur stig í þremur fyrstu leikjunum. Fram er eins og fleiri lið með þrjú stig eftir að hafa fengið að bragða á öllum réttunum til þessa, sigri, jafntefli og tapi.
Mörk Fram: Rúnar Kárason 6/1, Tryggvi Garðar Jónsson 6, Þorsteinn Gauti Hjálmarsson 5, Marko Coric 5, Reynir Þór Stefánsson 4, Kjartan Þór Júlíusson 2, Eiður Rafn Valsson 2.
Varin skot: Lárus Helgi Ólafsson 9/2, 26,5% – Arnór Máni Daðason 1, 12,5%.
Mörk Aftureldingar: Þorsteinn Leó Gunnarsson 7, Árni Bragi Eyjólfsson 7/1, Ihor Kopyshynskyi 6, Birgir Steinn Jónsson 5, Leó Snær Pétursson 3, Blær Hinriksson 2, Þorvaldur Tryggvason 1, Jakob Aronsson 1.
Varin skot: Brynjar Vignir Sigurjónsson 8, 25,8% – Jovan Kukobat 6, 46,2%.
Leikjadagskrá og staðan í Olísdeildum.
