Ákvað að nýta uppsagnarákvæði í samningi mínum

Þjálfaraskipti verða hjá Olísdeildarliði HK eftir keppnistímabilið sem stendur yfir. Halldór Harri Kristjánsson þjálfari HK staðfesti það við handbolta.is í dag. „Ég ákvað i síðasta mánuði að nýta uppsagnarákvæði í samningi mínum við HK og hætti þjálfun meistaraflokks kvenna í vor eftir fjögur ár með liðið,“ sagði Halldór Harri sem hefur verið í þjálfun í 18 ár.

„Ég ákvað þetta ekki vegna þess að ég ætla að taka við þjálfun annarstaðar. Mig langar bara að kúpla mig aðeins út úr hringiðunni eftir átján ár í þjálfun, þar af í fjögur hjá HK, og taka mér frí frá þjálfun. Svo getur líka verið gott að hleypa öðrum að,“ sagði Harri sem hefur verið í miklu uppbyggingarstarfi hjá HK síðan hann kom til HK eftir að hafa þjálfað hjá Stjörnunni um þriggja ára skeið og þar áður verið um árabil hjá Haukum.

„Ég hef nóg að gera í mínu aðalstarfi fyrir utan að það er örugglega kominn tími til að sinna eiginkonu og börnum í meira mæli en áður. Kannski verður maður orðinn óþreyjufullur að komast í þjálfun aftur þegar kemur inn á næsta tímabil. Kannski verð ég bara á kústinum á leikjum í Kórnum næsta vetur, hver veit? Ég á heima í nágrenni við Kórinn og börnin mín æfa hjá HK,“ sagði Halldór Harri Kristjánsson þjálfari Olísdeildarliðs HK í handknattleik kvenna.