Aldís Ásta Heimisdóttir og Jóhanna Margrét Sigurðardóttir létu sannarlega til sín taka í kvöld þegar lið þeirra, Skara HF, vann Kristianstad með sex marka mun á heimavelli, 35:29, í síðasta heimaleik liðsins í sænsku úrvalsdeildinni í handknattleik.
Þær skoruðu sex mörk hvor og var Aldís Ásta m.a. með fullkomna skotnýtingu auk þess að vera með átta stoðsendingar. Jóhanna Margrét átti tvær stoðsendingar auk sex marka. Skara var með fjögurra marka forskot eftir fyrri hálfleik, 17:13.
Skara HF er í sjöunda sæti þegar ein umferð er eftir. Skara sækir efsta lið deildarinnar, Sävehof, heim í lokaumferðinni sem fram fer eftir viku. Úrslitakeppnin tekur síðan við og er Skara öruggt um sæti í henni. Átta efstu liðin öðlast keppnisrétt í úrslitakeppninni.
